عبدالله خان مگسي

عبدالله خان مگسي: مشهور اديب عبدالله خان ولد ڌڻي بخش مگسي، تعلقي ۽ ضلعي دادو جي ڳوٺ گل محمد مگسيءَ ۾، 17 ڊسمبر 1947ع تي ڄائو. هن ابتدائي تعليم گورنمينٽ هاءِ اسڪول دادوءَ مان حاصل ڪئي. جنهن کان پوءِ انگريزي تعليم پرمانند پائلٽ هاءِ اسڪول دادوءَ مان حاصل ڪيائين. پاڻ بي. اي ۽ ايم. اي جون ڊگريون سنڌ يونيورسٽي ڄام شوري مان ورتائين.عبدالله خان 1976ع ۾ سنڌ پبلڪ سروس ڪميشن جو امتحان پاس ڪري نوابشاهه ۾ پوليٽيڪل سائنس جو ليڪچرار مقرر ٿيو. جتان ترقي ڪري اسسٽنٽ پروفيسر جو عهدو ماڻيائين. نوابشاهه ۾ رهندي ڪافي تحقيقي ۽ تاريخي مقالا، ڪهاڻيون ۽ ادبي مضمون لکيائين. جيڪي سنڌ جي اخبارن ۽ رسالن ۾ ڇپجندا رهيا. هن جي گهڻي صحبت حامد علي خانائيءَ سان هوندي هئي. جو قريشي صاحب پڻ ساڳئي ڪاليج ۾ اسسٽنٽ پروفيسر جا فرائض سرانجام ڏئي رهيو هو.
عبدالله خان مگسي ڪيترين علمي، ادبي ۽ تاريخي تنظيمن جو عهديدار ۽ ميمبر ٿي رهيو. جن مان سنڌ ليڪچررس ايسوسيئيشن (سپلا) ضلعي نوابشاهه جو صدر، نوابشاهه هسٽاريڪل ۽ ڪلچرل سوسائٽي جو عهديدار، سنڌ يونيورسٽيءَ جي سينڊيڪيٽ جو ميمبر، ميان يار محمد ڪلهورو يادگار ڪاميٽيءَ جو عهديدار، ڪاڇو بچايو تحريڪ جو ميمبر ۽ سرگرم ڪارڪن، سنڌ گريجوئيٽ ائسوسيئيشن (سگا) جو ميمبر ۽ سنڌي ادبي سنگت جو ميمبر پڻ رهيو. عبدالله خان ڪيترن ئي علمي، ادبي، تاريخي، ثقافتي ۽ سماجي سرگرمين ۾ حصو وٺندو رهيو. جنهنڪري سندس دوستيءَ جو حلقو پڻ وسيع هو. سنڌ، پنجاب، بلوچستان ۽ سرحد صوبي جا دوست اڄ به کيس ياد رکيو پيا اچن.
عبدالله خان مگسيءَ جي شايع ٿيل ڪتابن ۾ ‘عالمي امن ۾ سنڌي اديبن جو حصو’، ‘تاريخ جو جديد مطالعو'>سنڌ جي تاريخ جو جديد مطالعو’ ۽ ‘جان جان هئي جيئري’ قابل ذڪر آهن. ٻيا به ڪيترائي مقالا ۽ مضمون ڇپائيءَ جي اوسيئڙي ۾ آهن.
عبدالله خان مگسي ڪينسر جهڙي موذي مرض ۾ مبتلا ٿي ويو. جنهنڪري نوابشاهه کان بدلي ڪرائي پنهنجي اباڻي ڳوٺ دادوءَ ۾ ڪاليج ۾ مقرر ٿيو. ٿوري عرصي کانپوءِ کيس موت مهلت نه ڏني. هن 1 اپريل 1993ع تي وفات ڪئي. کيس اباڻي قبرستان، پير محمد مراد ۾ دفن ڪيو ويو.

داخلا ۾ استعمال ٿيل تاريخون

1947.12.17  عيسوي

مشهور اديب عبدالله خان ولد ڌڻي بخش مگسي، تعلقي ۽ ضلعي دادو جي ڳوٺ گل محمد مگسيءَ ۾، 17 ڊسمبر 1947ع تي ڄائو.

1993.04.01  عيسوي

عبدالله خان مگسي 1 اپريل 1993ع تي وفات ڪئي. کيس اباڻي قبرستان، پير محمد مراد ۾ دفن ڪيو ويو.

اديب - ڀاڱي جون ٻِيون داخلائون